رواية ابوس راسك يا زمن ماعاد فيني للجراح رواية سعودية مشوقه كاملة (2)

مع كل الحب اترككم مع

الجزء الثاني

(الفصل الاول)


صحى فيصل من النوم الساعه 8 اخذ له شور وصلى اللي فاته وتصل على صديقه وليد
(فيصل ماعنده اصدقاء ماعدا طلال ولد خاله الوحيد و وليد صديقه واقرب له من روحه)
وليد : هلا والله بالنسيب
فيصل : اللي يسمعك يقول عندك خوات ومبتلش فيهن مايدرون ان كل اللي عندك اختين ومتزوجات
وليد بخبث : مايندرى يمكن انا اللي اناسبك
فيصل : اذا صرت خطابه بقولك تقدم ملفك
وليد : عاد توصى فيني
فيصل : وليد ترى والله الدنيا ضايقه فيني خلك من هالهذره وقولي وين اقابلك
وليد بقلق : سلامات يأخوي وش فيك
فيصل : اذا شفتك اقولك
وليد : طيب انا عازمك على العشاء نتقابل في مطعم الريف اللبناني
فيصل : لا مزحوم على طول وازعاج نتقابل في الجلوب في الفيصليه
وليد : صار على خير ان شاء الله
قفل فيصل من وليد واتصل على المطعم علشان الحجز
وطلع من بيته وهو يفكر بجده والقرار اللي اجبره عليه


بعد ساعه في المطعم

وليد : عسى ماشر وش اللي مضيق صدرك؟
فيصل : جدي ياوليد
وليد: ليه عسى ماشر زاد عليه شي؟
فيصل : لا حالته مثل ماهي بس قرر يزوجني
وليد : الله يرجك ياشيخ وانا على باللي سالفه كايده
وليه ماتبي تتزوج باقيلك سنه وتصك الثلاثين اللي متى ماتبي الزواج؟
فيصل : المشكله ماهي بالزواج المشكله بالبنت اللي بتزوجها
وليد بأستغراب : ليه وش فيها ؟
فيصل : فيها انها بنت عمي تعرف وش معنى اني اناسب واحد من اعمامي
وليد : يافيصل لاتظلم البنت يمكن تختلف عن ابوها ... الا هي بنت مين فيهم؟
فيصل : بنت عمي ابراهيم
وليد : على الاقل اهون من عمك سلطان
فيصل : كلهم مثل بعض مااخس من هذا الا هذا
وليد : طيب انت شوفها بفترة الخطبه والملكه يمكن تغير رايك بالبنت وتكتشف انها غير عن ابوها
فيصل : ههههههههههههههه ضحكتني قال خطوبه ياوليد ملكتي عليها بكره وبعدها يومين الين اجهز
جوازها واخذها ونروح ألمانيا عند جدي
وليد بصدمه : ملكتك بكره ومتى خطبت ومتى شاورو البنت كل هذا صار بدون مدري ؟
فيصل : انت الوحيد اللي يدري الى الآن
(وقاله فيصل كل السالفه)
وليد : والله غريبه وايش سبب اصرار جدك واستعجاله ؟؟
وايش معنى هالبنت بالذات مع انه فيه اللي اكبر منها ؟؟
فيصل : لاتسألني كل اللي اعرفه ان بكره العصر ملكتي وبس
آ آ آ هــ ياوليد اخر عمري اناسب عمامي اللي من طلعت على الدنيا
وانا ماشفت منهم غير الكره والعداوه
وليد : مستحيل انهم يكرهونك يافيصل انت ولد اخوهم بس يحز بخاطرهم
انك تمتلك اكثر من النص في شركة ابوهم
فيصل : ياوليد انت عارف ان مالهم شي عندي والخير اللي عندي ورثي من ابوي وامي
وليد : يافيصل انا عارف كلها هذا بس هم مو مقتنعين يحسون ان ابوهم عطاك اكثر من حقك
فيصل : الا قول انهم طماعين ومايملا عينهم غير التراب ويكفى اني ساكت عن بلاويهم
عمى سلطان بعد ماشبع من اختلاساته فتح له شركه خاصه وفتكيت منه هو وولده تركي
صار يحاول يسرق مناقصاتنا وعمي ابراهيم على نفس خطاه كل يوم اختلاس
وساكت لهم بمزاجي كله علشان انهم عمامي وعلشان مضيق صدر جدي
وليد : يافيصل انا عارف كل هذا والله يهديهم بس المهم ماقلت لي وش معنى هالبنت؟؟
فيصل : علمي علمك يقول انها هي اللي تناسبني وتفهمني
وليد : جدك يحبها والا مثل البقيه ؟
فيصل بسخريه : ههههههههه قال يحبها احيانا اشك انه يحبها اكثر مني ومن امي ام ماجد
وليد : خلاص يافيصل ليه مضيق صدرك دامه يحبها كل هالحب معناها البنت تختلف عنهم
وتستاهل انك تزوجها ولاتنسى ان جدك ذكي وكاشف عمامك
فيصل : فكرة في كل هذا بس مايمنع اني ماابي هالزواج واحس اني مغصوب عليه
وليد : يافيصل انت مو بنت علشان تنغصب
فيصل : بس خيرت بين رضى جدي وبين حريتي
المهم قفل على هالموضوع وخلنا نتعشى


الساعه 10 في غرفة ليان

خلصت ليان من صلاة الاستخاره للمره الثانيه وحطت راسها على مخدتها ونامت
حست بيدين تهزها وتحاول تجلسها
فتحت عيونها لقت لين ماسكتها وتسمي عليها
لين : ليان عمري اشفيك وش هالحلم اللي خلاك تصارخين وتنادين على جدي
كانت ليان ساكته وترتجف من الحلم اللي شافته وتحس بالالم في كل جسمها
ماكانت تبي تقول لين اللي شافته : لا بس كنت اتحلم بجدي يمكن من كثر تفكيري فيه
وشوقي له .. كم الساعه؟
لين : الساعه 2
ليان : صحيتك من نومك؟
لين : لا ياعمري ماكنت نايمه وحسيت بجوع ولما جيت انزل تحت سمعت صوت صراخك
ليان : طيب ياعمري روحي كلي بالعافيه عليك وانا بقوم اصلي لي ركعتين ورجع انام
لين : اوكي ياقلبو ولو بغيتي شي ناديني
وطلعت وقفلت الباب وراها
جلست تفكر بالحلم اللي شافته وايش بيكون تفسيره
حلمت انها بمكان مهجور بس تحس انه مو غريب عليها
سمعت صوت جدها يكلمها بس بدون ماتشوفه كان يوصيها على نفسها
ويقولها مهما قالو فيك ومهما سوو لا تضعفين كوني دايم قويه
حاولت اني احميكي منهم وجاء دورك تحمين نفسك
صارت تدور عليه بس اللي لقتهم اهلها مو جدها كانت وجيهم غريبه
عليها حاولت تهرب وتدور على جدها سمعت نباح كلاب وكل ماله الصوت يقرب
وفجاءه هجمو عليها كل ماهجم واحد نهش من لحمها كانت تصرخ وتنادي
على جدها وتناظر في اهلها بس كانو واقفين ويتفرجون عليها
قامت من سريرها وغتسلت وصلت ركعتين وجلست تقراء قران لعلها ترتاح
وهي كلها اصرار انها تنفذ كلام جدها

في بيت فيصل

صحى من نومه الساعه 8 الصباح اخذ شور ولبس وطلع للشركه
صدق انه الخميس بس مايمنع انه يروح يشوف شغله
دخل الشركه شاف اغلب الموظفين مداومين طلع فوق لمكتبه
شاف راكان وخالد مداومين
لما شافهم تذكر معارضته لجده في انهم يشتغلون في الشركه
بس طلع تركي وراكان غير ماتوقع صدق انه مايستلطف خالد
لانه مغرور وشايف نفسه
بس اثبتوا انهم مخلصين ونشيطين بشغلهم
فيصل يكلم نفسه ( الله يحفظك ياجدي كل مره تثبت لي ان قراراتك حكيمه
بس ان شاء الله يكون قرارك بزواجي من ليان صح مثل البقيه
وماتكون كبوة حصان وغلطة الشاطر بألف وانا الي بدفعها)


الــــــــــســــاعه 10

قامت ليان من نومها نشيطه اخذت شور ولبست ونزلت تحت كان وجهها صافي ومشرق
لانها المره الوحيده اللي تنام الى هالوقت بالعاده تصحى من الفجر

شافت امها جالسه تفطر
لين بعد ماباست راس امها : صباح الخير يالغلا
ام راكان : صباح النور اشوف انك مثل الحصان اجل ليه لين تقول انك تعبانه
ليان : سلامتك يالغاليه بس البارح تعبت شوي والحين الحمدلله بخير
ام راكان : دامك بخير خلصي فطورك وقومي شوفي شغلك
ليان : ان شاء الله يالغاليه
خلصت فطورها واستلمت شغل البيت كالعاده

الـــــــــــســـاعه 1 ونص على الغداء في بيت ابو راكان

ابو راكان : كيف كان الشغل اليوم ؟
راكان : مثل مايسرك وعلى فكره فيصل داوم اليوم
(ارتجفت ليان وهي ماسكه الملعقه نزلتها بسرعه قبل لا احد يحس)
ابو راكان : وش جايبه اليوم عمك يقول انه ماهو جاي غير الجمعه او السبت؟
راكان : والله يالغالي علمي علمك
ابو راكان : عمك درى عنه انه مداوم؟
راكان : مدري والله بس اكيد تركي بيقوله
ابو راكان : ايه زين .. انا قايم انام لااحد يزعجني
طلع ابو راكان لغرفته اول مادخل غرفته الا جواله يرن
ابوراكان وهو يناظر جواله (الله يستر وش عنده داق ليكون العله فيصل كاشف شي وقايله)
ابو راكان : حي الله هالصوت وراعيه
ابو عبدالعزيز: تحيا وتدوم وينك فيه ؟
ابو راكان دام السالفه وينك فيه على طول اجل رحنا فيها : في البيت وشلونك عساك طيب؟
ابو عبد العزيز : ليه يهمك؟
ابو راكان: وشلون مايهمني انتي تدري بغلاتك عندي بس مدري منهو اللي مغيرك علي؟
ابو عبدالعزيز : ايه ادري انك تغليني وانا اغير ماتغير.. عندك احد ؟
ابو راكان : لا انا بغرفتي فيه شي صاير شي
ابو عبدالعزيز : مافيني غير العافيه .. اسمعني ونفذ اللي بقولك عليه
وماابي مخلوق يدري بالسالف هالا لما يتم كل شي
ابو راكان : ابشر باللي يسرك
ابو عبدالعزيز: فيصل خطب مني ليان وانا وافقت وقلت له انك موافق وبيجي اليوم بعد العصر ومعه الملاك والشهود
ابو راكان بعصبيه : وليه وانا مالي كلمه وبعدين لمى اكبر منها وماتزوجت
ابو عبدالعزيز : لمى اذا ربي كاتب لها بيجيها نصيبها
ابو راكان : دامك بتخطب له ليه ماخطبت له وحده من بناتي لمى او لين مالقيت غير ليان
ابو عبدالعزيز بعصبيه : وليان بنتك بعد ولاتحدني ياابراهيم على شي مابيها لا والله واللي
رفع سبع وخفض سبع اني لا اقسم كل حلالي بيع وشراء بين فيصل ونوره وليان ومترك لك انت
واخوك ريال واحد
ابو راكان : يايبه الى متى وانت تتحكم في حياتي مايكفي اللي راح
ابو عبدالعزيز : عمري ماتحكمت في حياتك ياابراهيم غير مره وحده وخذت كثررر مقابلها
وحتى هالمره ماراح ابخل عليك وبكلم المحامي بعد مايتم كل شي مثل ماابي يحول بحسابك
20مليون ويسجل الارض اللي بمكه اللي مناشبني عليها بسمك
كل اللي ابيه منك تتصل على فيصل الحين وتقوله انك تنتظره العصر ويجيب معه الملاك والشهود
ابو راكان : مايصير خاطرك الا طيب بس لمتى ماتبي احد يعرف بالموضوع
ابو عبدالعزيز : بعد ماتم الملكه سو عشاء واعزمهم عليه وذا سالوك عن المناسبه قولهم بمناسبة ملكة فيصل على ليان
ابو راكان : يصير خير ان شاء الله
قفل ابو راكان من ابوه وهو معصب بس اللي مهون المبلغ على قيمة الارض على الفلوس اللي عنده بتدخله
شريك بالنص في شركة اخوه
اخذ جواله واتصل على فيصل واتفق معاه

انتهى الفصل الاول من الجزء الثاني
اعذروني لقصر البارت ولان مافيه احداث مهمه لكن كان هذا البارت لتوضيح علاقة فيصل باعمامه
واوعدكم بالافضل ان شاء الله في الجاي

اختكم معزوفه حزينه

هــمــســهـ ( اتمنى ان يحوز ولو على القليل من رضاكم )

بكل الحب اترككم مع

الــجـــزء الـــــثـــــــاني

(الفصل الثاني)

بعد صلاة العصر في بيت ابو راكان

ابو راكان : جهزو القهوه والشاهي بيجوني ضيوف الحين
ام راكان : منهو ضيوفك
ابو راكان : بعدين اقولك اخلصو جهزو اللي قلته وارسلوه لي بالمجلس اكيد الضيوف على وصول
راح ابو راكان على المجلس وفعلآ بعد 10 دقايق وصل فيصل ومعاه وليد والملاك والمحامي

في المطبخ
جلست ليان بعد ماارسلت القهوه والشاهي للمجلس
ياربي منو الضيوف اللي عند ابوي معقوله يكون فيصل
لا اكيد مو هو ابوي الى الان ماقال لي أي شي ولا حتى امي تعرف منو ضيوفه
سمعت صوت ابوها يناديها .... قامت وطلعت له بالصاله
ليان : هلا يبه ناديتني
ابو راكان : تعالي معاي
اخذها معه للمجلس الثاني وتركها وراح لمجلس الرجال
وبعد دقيقتين رجع لها ومعه دفتر
ابو راكان : يله وقعي
ليان : شنو هذا وعلى ايش اوقع ؟
ابو راكان بحده : ملكتك على فيصل اخلصي وقعي
ليان بصدمه : وشلون اوقع يبه وانت ماشاورتني ولا حتى قلت......
ابو راكان يقاطعها بصراخ : هذا انا قلت لك ويله وقعي
سمت بسم الله و وقعت بقلب مقبوض ويد ترتجف
طلع ابوها وراح لمجلس الرجال وهي مازالت واقفه ومصدومه من تصرف ابوها
فوق انها فقدت حقها كأي بنت في انه يقولها ويشاورها وفي ان هاللحظه تكون اجمل لحظه بعمرها
طلع من عندها حتى كلمت مبروك ماقالها لها
نزلت دموعها قهر وحزن ماعمرها عصت له كلمه ولاعمرها رفعت صوتها بحضوره
كانت طول عمرها البنت الباره له حتى طلبات مثل خواتها ماتطلب علشان ماتزعله
والفلوس اللي كان يعطيها لها جدها بالسر كانت تأخذها وتعطيها ابوها على امل انها تشوف منه ابتسامه
او تسمع كلمه حلوه لكن كل هذا ماغير شي وكان هو وامها يعاملون الخدم بأفضل من معاملتهم لها بكثير
وجود جدها هو الشي الوحيد اللي يخليهم يحسنون يعاملتهم معها

في المجلس

طلعو الرجال ومابقى غير فيصل وعمه
فيصل : يله انا أستأذن وبخصوص العشاء انا تكفلت بكل شي وبيجون يجهزون بعد المغرب
بس انت قولهم وين يحطون البوفيه فيه
ابو راكان (ايه كريم من مال غيره) : خير ان شاء الله

في غرفة منال

منال تكلم لمى بالتلفون
منال بفرحه : لمى فيصل جاء سمعت تركي وهو يقول لابوي اليوم انه مداوم
ودامه داوم اليوم اكيد الليله انه بيروح لعمتي
لمى : ادري سمعت راكان اليوم يقوله .. قررتي تروحين؟
منال : ايوا وبتصل على ندى بعد المغرب وبقول لها اني طفشانه وبجي اسلم عليها وعلى عمتي
وش رايك تروحين معي يمكن احتاجك؟
لمى : خلاص بقول لامي ومري علي
منال : اوكي سي يو


طلع فيصل من بيت عمه وهو يحس ان كل هموم هالدنيا فيه
اتصل على جده علشان يقوله ان كل شي صار مثل مايبي
فيصل : الووووو هلا جدي
ابوعبدالعزيز : هلا بولدي مبروك يالغالي
فيصل بضيقه : الله يبارك فيك هاه ارتحت الحين
ابو عبدالعزيز : طول عمرك مريحني الله يرضى عليك ويرحم ابوك اللي ماعمره عصى لي كلمه
فيصل : الله يرحمه ويغفرله
ابو عبدالعزيز : ومتى بتجون؟
فيصل : اخذت جوازها من ابوها بس الفيزا تأخذ وقت لكن ان شاء الله اني بقدر
اخلصها في يومين او ثلاثه وبعدها نجي
ابوعبدالعزيز : على خير ان شاء الله وانا جدك ولا تنسى يوم السبت تفتح لها حساب وتحط مهرها فيه
فيصل : ان شاء الله
ابو عبدالعزيز: شريت لها شبكه وهديها تقدمها لها الليله؟
فيصل : لا نسيت
ابو عبدالعزيز : ياولدي ترى مايجوز هذي بنيه يكفى انها مافرحت مثل البنات بملكتها
وحتى زواج منت مسوي
فيصل : والله ياجدي انت المستعجل
ابوعبدالعزيز : ابي أتطمن عليها قبل لا اموت الواحد منا مايدري متى تجي ساعته
فيصل : الله يطولنا بعمرك ويحفظك لنا وابشر يالغالي ماطلبت شي الحين اروح واشتري
ابو عبد العزيز : الله يرضى عليك يله بحفظ الرحمن وطمني عليك
فيصل : ان شاء الله بحفظ الكريم


في بيت ابو راكان
ابو راكان : سعاد .... سعااااااااااااااااد
ام راكان وهي نازله مع الدرج : خيررررر وشفيك تصارخ
ابو راكان :ترى عندنا عشاء الليله وانا اتصلت على سلطان ونوره وعزمتهم شوفي اذا بتعزمين احد غيرهم
ام راكان :صاحي انت ؟؟ جايني الحين تقول عندنا عشاء متى اجهز لكل شي
ابو راكان: كل اللي مطلوب منك انتي وبناتك انكم تجهزون وتقولين وين تبين البوفيه حق الحريم وكل شي بيكون جاهز
ام راكان :اذا على كذا مايخالف والبوفيه حطه في الحديقه اللي وراء
ابو راكان : طيب وبخصوص ليان خليها تلبس وتجهز مثل البنات
ام راكان : خيرررررر وش الطاري
ابو راكان : بعدين اقولك ليه وايش سبب هالعزيمه انا الحين مستعجل عندي شغل
وتركها وطلع
ام راكان : لياااااااااااااااان .. لياااااااااااااان وصمخ
كانت لياااااان في المطبخ تبكي سمعت صوت امها قامت غسلت وجهها وراحت لها
ليان : سمي يمه
ام راكان : نادي لمى ولين وانزلي معاهم
طلعت نادتهم ونزلو لامهم
ام راكان : اليوم عندنا عشاء وبيجون بيت عمكم سلطان وعمتكم وبعض معارفنا
لمى : شنو سر هالعزيمه المفاجـأه ؟
ام راكان : مدري عن ابوك وبعدين انا بطلع للمشغل اذا فيه احد بيروح معي
لمى : يس ماما انا بروح
لين : لا انا بجهز نفسي ماراح اروح
ليان : اجل انا بروح
ام راكان بحده : دام لين مو رايحه وشهوله تروحين خليك في البيت
سكتت ليان وماحبت تعارض امها وطلعت مع لين فوق والدموع بعيونها
لين بعد مانتبهت لها : ياقلبي لاتزعلين واذا علشان الروحه للمشغل اوعدك ياقلبي اخليك ملكة جمال
ناسيه ان اختك خبيره في الميك آب والشعر
ليان : الله لايحرمني منك وانا بتجهز بنفسي لاتشغلين نفسك فيني
لين : قال اشغل نفسي ياغبيه هذي موهبه يعني انا المستفيده وبعدين بربك وين بلاقي احلى منك اتفنن فيها بالميك آب
ليان : ههههههه اوكي اذا على كذا سوي اللي تبين
لين وهي تناظر شعر ليان : انا طالعه لصيدليه القريبه من البيت على ماتخلصين شورا كون جيت
ليان : ليه طيب
لين : سوي اللي اقولك عليه وماابي أي معارضه
تركتها وراحت تلبس عبايتها وتطلع

بعد ربع ساعه في غرفة لين
دخلت لين الغرفه وبيدها كيس ومعاها قصدير
ليان : وش شريتي وليه هالقصدير وش ناويه تغلفين؟
لين : هههههههههه ناويه اغلفك انتي عندك مانع ؟ ويله خلينا نبدى قبل لايخلص الوقت علينا وحنا ماسوينا شي
ليان : مااقول غير الله يستر
اخذت لين المقص وبدت تقص شعر ليان



في بيت ابو تركي


منال بغرفتها تكلم : شوف ياسعود مو كل مره تفتح لي هالموضوع طلعه ماراح اطلع معاك ولاتخليني اعصب منك ترى انت اللي بتندم
سعود : طيب انا اطلع معاك للمطاعم انتي وصديقاتك وش فرقت لو طلعنا بروحنا؟
منال : هذا انت قلتها مع صديقاتي يعني انت بس منظر ديكور قدامهم ولاتطمح لااكثر من كذا
سعود : والله مشتاق لك ونفسي اشوفك مو ذنبي اني حبيتك
منال :::: ههههههههههههه ضحكتني يابابا على مين تلعب سعود انت عارف اني مااحبك وانت ما تحبني
اللي جمع بينا المصلحه انتي تبي فلوس وعز وانا ابي واحد حلو اتفشخر فيه قدام البنات بس
(سعود شاب وسيم وجسمه رياضي ويحب المظاهر والكشخه بس وضعه المادي مايساعد ومنال وفرت له
السياره الكشخه واللبس الماركه والمصروف والاكل في افضل المطاعم مقابل انه ينفذ كل طلباتها )
سعود : كل ماكلمتك لازم تجرحيني يامنال وتحسسيني بالنقص
منال : اشوف قمنا نقول كلام كبير لااجرحك ولا انقصك اللي بينا بيزنس تو بيزنس
ويله باي بقوم اتجهز وراي طلعه
(لبست وطلعت للمشغل لانها كنسلت روحتها لبيت عمتها بعد ماعرفت من امها عن عزيمة عمها ابراهيم وان عمتها بتحضر)


في بيت العمه نوره (ام ماجد )

طلعت ندى من غرفتها تركض لغرفة امها وهي تصارخ : يــــــــــــــمــــــــه يــــــــــــــمــــــه لــحقي
مالقتها بغرفتها جت بتنزل تحت الا امها طالعه الدرج ركض على قدر ماتقدر
ام ماجد بخوف : وش فيه وش صار
ندى : يمه لحقي بيت خالى ابراهيم عندهم عزيمه يله خلينا نروح
ام ماجد وهي تحاول تمسك نفسها لاتذبح بنتها : حسبي الله عليك من بنت اللي منتي مرتاحه الين تخليني الحق ابوك
ندى ببراءه : بسم الله عليك يمه ليه؟؟
ام ماجد وهي تشد شعر بنتها : كل هالصراخ زين اللي ماوقف قلبي واخرتها علشان العزيمه وانا اللي على بالي فيه مصيبه
ندى وهي تتألم : أي يمه فكي شعري يعني مابعد عرفتيني اذا صارخت اعرفي ان ماعندي غير ماعند جدتي البلا اذا شفتيني لابده وساكته اعرفي ان وراي مصيبه
ام ماجد انتبهت ان الجوال بيدها وتذكرت انها كانت تكلم فيصل قبل صراخ المهبوله بنتها
ام ماجد : هلا يمه سامحني
فيصل بخوف : يمه وشفيه ؟
ام ماجد : ماصار شي ياولدي هذي اختك المهبوله السلك الوحيد اللي بمخها فصل
فيصل : هههههههههههههههههههه ماتعقل هالبنت
ام ماجد : ايه انت تضحك وانا بيتوقف قلبي هاليومين
ندى فتحت فمها : ياكبرها عندي ربي فيصل ضحك
ام ماجد : بسم الله على ولدي وليه مايضحك
ندى تسحب الجوال من امها
ندى : فيصل
فيصل : الحين انتي متى بتعقلين وترحمين امي من فعايلك
ندى : ايه هذا فيصل اللي اعرفه ... فيصل اسألك بالله من شوي ضحكت؟
فيصل : ايه ضحكت ليه ؟
ندى بجديه : فيصل انت وينك؟؟ وعندك احد ؟؟
فيصل : في البيت ومااحد عندي ليه ؟؟
ندى بفرحه : يااااااااااااااااي لاتقول لاحد انك ضحكت اخاف يطير مني السبق الصحفي
فيصل بحده : الظاهر الكدمات اللي بيديك طابن ومشتاقه لغيرها؟
ندى بخوف : لا واللي يرحم والديك ماصدقت راحو انت اللي يمزح معك لازم قبل يكتب وصيته
خذ امي .. ورمت الجوال على امها
ام ماجد : هلا يمه وش انت قايلها ومنها خافت
فيصل : لا بس ذكرتها بالكدمات
ام ماجد : ههههههههههههههههه اجل بعذرها ومنها خافت
فيصل : يمه حرام عليكم سويتوني دراكولا
ام ماجد : والله يمي مااعرف ديكلا اللي تقول عليه اللي اعرفه الرجل الاخضر وانت ماتباعده بسم الله عليك
فيصل : ههههههههههههههه يمه مالقيتي غير الرجل الاخضر تشبهيني فيه
ام ماجد : وانا عند ربي صادقه وانا امك ارحم نفسك من هالحديد اللي تشيله كل يوم
فيصل : ابشري يالغاليه يله فمان الله بروح اخلص لي كم شغله
ام ماجد : في حفظ الله ياولدي
ندى : يمه يله خلينا نروح الحين لبيت خالي ابراهيم ابي لين تسويلي ميك آب
ام ماجد :مافيه روحه غير بعد صلاة العشاء وشهوله لين تسويلك ليه ماتسوين لنفسك
ندى : يمه لازم تحرجيني تعرفيني اني مااعرف اسوي وبعدين لين الميك آب اللي تسويه روعه
ام ماجد : هذا البنات السنعات مهو انتي اللي ماتعرفين غير للبلايستيشن والا الكوره وخلاص لاتصدعين راسي
نروح قبل صلاة العشاء بشوي

قبل صلاة العشاء بص ساعه

فتحت ندى غرفة لين وهي مقطوع نفسها من الركض على الدرج
لين : خير وشفيك طايره؟
ندى : وخري من قدامي خطر اشفطك
لين : طيب اجلسي وخذي نفس لاتنكتمين علينا انتي ناسيه ان معاك الربو
ندى : الله تخيلي انكتم واصير مقدر اتنفس ويغمى علي (ورمت نفسها على السرير غمضت عيونها) ويجي فارس احلامي وينقذني بقبلة الحياه ويشيلني بين يديه
في هاللحظه طلعت ليان من غرفة الملابس وسمعت كلامها
ليان : هي لين اكتميها بمخده او أي شي هذي وصلت للقبله الله يستر من الباقي
ندى وهي تقوم من السرير: وش اسويلكم اذا تفكيركم دايم غلــ.....
قطعت كلامها لما شافت ليان وقعدت تطالعها وهي فاتحه فمها
ليان بخوف: ندى سكري فمك وقولي لي وش شايفه شكلي غلط هالمجرمه محلفتني مااشوف أي مرايه الين تسمحلي
ندى وهي الى الان منصدمه : منو اللي سوا فيك كذا؟؟؟؟؟؟؟

(كانت ليان لابسه فستان بنفسجي ناعم مره بدون اكمام الى تحت الركبه وفيه من تحت الصدر شريطه عريضه شوي فيها نقش ناعم بالبنفسجي وجزمه (عزكم الله) فضيه بشرايط تلتف على الساق ونفس الشي منقوشه الشرايط بالبنفسجي والاكسسوار كان عباره عن سلاسل فضيه ناعمه مره معلق فيها نجوم صغيره ونفس الشي الحلق والسواره _ وشعرها مقصوص تدرج على نفس طوله ومسويه لين لها خصل بنفسجي باذنجاني _ والميك آب طلع عيونها خياااااااااااال كانت دامجه الوان الابيض والازرق والبنفسجي والوردي _ يعني بختصار كانت مبهره بجمالها مسمى ملكة جمال شويه عليها) <<< مااعرف اوصف خخخخخخخخ بس ان شاء الله تكونو فهمتو علي
ليان : منو يعني اكيد المجرمه اللي وراك
ندى : لــــــــــــــــــــــــيــــــــــــــــــــــــ ن
لين : ايه انا ليه مو عاجبك ؟
ندى بوجه يكسر الخاطر : لين انتي تعرفين ان ابوي ميت؟
لين وهي تحاول تستوعب اش دخل ابوها بالسالفه : ايه ياعمري اعرف صار له عشر سنين ليه انتي توك تدرين ؟
ندى : يعني انا يتيمه واكسر الخاطر؟
لين : هو انتي تحملين مسمى لاحظي مسمى بس يتيمه لكن غيره لا
ندى قلبت فجأه : اقول ترى عطيتك وجه المأسي اللي بحياتي كلها قلتها وشوي وعصر لك دمعتين وانتي لاحياه لمن تنادي زبدة الهرج بتسوين لي مثلها بالطيب والا بالغصب
ليان : ههههههههههههههههههه مايحتاج كل هالمقدمه ياعمري انتي بس استخدمي الكلمه السحريه حطي لي ميك وقبل لاتكملينها بتلاقينها مجلستك وتحوس فيك
لين : تطنزين هذي موهبه يالغبيه
ليان : طيب قبل لاتنغمسين في موهبتك تسمحين لي اشوف المرايه؟؟
لين : ههههههههههههههههههههه تصدقين نسيت اني محلفتك واقول هالخبله ليه الى الان ماشكرتني ..ايه ياعمري مسموح لك
وقفت لين قدام المرايه وظلت 5 دقايق تحاول تستوعب اللي تشوفه هي صدق كانت تسمع من الكل انها حلوه وجمالها غريب لكنها اول مره تحس انها حلوه فعلا .. انحرمت من شغلات كثيره عمرها ماحست انها مثل باقي البنات مسموح لها تلبس وتكشخ وتشتري اللي تبيه حتى بليلة ملكتها محد اهتم فيها ولولا الله ثم لين ماصارت كذا كل اللي عليها للين والميك والشعر هي اللي سوته لها
بدون ماتحس بنفسها سحبت لين وضمتها وهي ساكته كانت عارفه انها لو تكلمت بتنزل دموعها ولين كانت حاسه فيها وحترمت سكوتها ولا تكلمت

بعدها بساعه كان كل الضيوف وصلو ... وليان الى الان بغرفتها خايفه تنزل اخيرآ تشجعت ونزلت
اول مادخلت عليهم كلن سكت ويناظرونها اول من تكلم عمتها نوره (ام ماجد )
ام ماجد : بسم الله ماشاء الله تعالي يمي سلمي علي
راحت وسلمت على عمتها
ام ماجد تكلم ليان بصوت واطي : قريتي على نفسك يمي
ليان : ايه عمتى
ام ماجد : روحي سلمي على الضيوف وتعالي اجلسي عندي
راحت ليان وسلمت ورجعت عند عمتها اللي حطت يدها على راسها وصارت تقراء عليها


في غرفة لمى

لمى بطفش : منال حرام عليك صار لك اكثر من ساعه وانتي حابستنا في هالغرفه وتناظرين مع الشباك لو بيجي كان جاء من بدري
منال : لمى ابي اشوفه وربي مشتاقتله حيل
لمى : ههههههههههههههههههههههه اللي يسمعك يقول انه يحبك
منال : يحبني او مايحبني ماراح يتزوج غير فاهمه فيصل لي انا
لمى : منال افرضي سمعتي في يوم انه تزوج وش بتسوين؟؟
منال بعصبيه : وربي لا اقتل أي وحده تفكر تأخذ مني فيصل والله لا اقتلها واشرب من دمها
لمى : حشى سفاحه هذا وانا اقول افرضي ماقلت تزوج
منال بصراخ : انتي ماترتاحين الا اذا نكدتي علي
لمى : انكد على نفسي ولا انكد عليك ياقلبي ويله روقي وتعالي نشوف الاوضاع تحت وبعدها نرجع

نزلت منال ولمى تحت اول مادخلو لفت نظرهم شكل ليان
منال بحقد : متأكده انها تكون اختك ؟؟؟
لمى وصدمتها بشكل ليا ن مو اقل من منال : ههههههههههههه ايه متأكده انها اختي شهادة ميلادها تقول انها بنت امي وابوي وتؤام لين بعد
منال : قهر تخيلي لو بس فيصل شافها والله ولا حتى يفكر ينظر فيني مو يتزوجني
لمى : لاتحقرين عمرك حتى انتي ماشاء الله عليك مو ناقصك شي
منال : بعد اللي شفته بديت اشك ... خليني من اختك العله وتعالي فوق ابي اكمل مراقبه
لمى : روحي انتي وانا بروح اشوف لي طريقه اعرف فيها اذا فيصل جاء او لا
طلعت منال فوق وراحت لمى لامها
لمى : يمه ماسالتي ابوي وش سبب هالمناسبه ؟
ام راكان : الله يذكرك بالشهاده بروح اساله احرجني الحريم وانا مو عارفه وش اقول
لمى : وشوفي من جاء ومن ماجاء (بكذب ) لان عمتي نوره سالتني اذا احد جاء من الرجال غير عمي سلطان وعياله وقلت لها بشوف
ام راكان : وعمتك هذي مدخلتن عمرها بكل شي .... (وهي تقوم) انا رايحه اشوف ابوك وانتي اجلسي مع الضيوف الين اجي
انتظرت لمى الين راحت امها للمجلس الثاني ولحقتها بهدوء تبي تسمع اذا فيصل جاء او لا

في المجلس الثاني
ام راكان : ماقلت لي وش سر هالعزيمه ؟؟
ابو راكان : بقولك بس لاتعصبين الين تفهمين السالفه
ام راكان : قول خوفتني
ابو راكان : العزيمه بمناسبة ملكت فيصل على ليان
ام راكان : نـــــــــــــــــــــــــــــــــــــــعـــــــــ ــــــــم ومتى كانت الملكه ؟
ابو راكان :اليوم العصر كنت مجبر اني اوافق
ام راكان : وشلون تسوي كذا وبدون ماتقولي ودامك بتزوجه ليه مازوجته وحده من بناتي لمى والا لين احق بخيره منها
ابو راكان : وليان بنتك وبعدين اللي سويته من مصلحتنا واذا راحو الضيوف بفهمك كل شي وبتعرفين ان اللي سويته هو الصح

رجعت لمى قبل لاتحس عليها امها اول ماشافت امها جايه راحت لها
لمى : يمه منال تعبانه شوي وهي بغرفتي الحين وترى بروح اوديها لبيتهم
ام راكان : سلامتها وشفيها؟؟
لمى : يعني صداع ودوخه المهم لاتقول لخالتي ام تركي الا بعد العشاء علشان ماتخاف
ام راكان : طيب بس اول ماتوصلين طمنيني
لمى : ان شاء الله يمه
طلعت لمى فوق عند منال
لمى والضيقه واضحه عليها : منال فيصل مو جاي وبعدين انا حاسه اني بنفجر وتعبانه ماابي اجلس هنا ابي اطلع اغير جو وقلت لامي وهي موافقه
منال : اشفيك وش صاير
لمى وهي شوي وتصيح : منال بتطلعين معي والا اطلع بروحي
منال : ول شكل السالفه كايده يله طلعنا وش بيجلسني دام فيصل مو جاي
لبسن وطلعن من الباب الخلفي علشان محد يشوفهن
في السياره
لمى : منال لو لي خاطر عندك تعالي نروح بيتكم
منال : خلاص ياعمري اللي تبين
ارسلت لمى رساله على جوال سحر ( سحر تعالي بسرعه على بيت منال فيه موضوع خطير يخص منال ومحتاجه وجودك معي ولاتتصلين لانها عندي وماقدر ارد )

( سحر تكون صديقة منال ولمى ومعهم بالجامعه وهي رأس الشر والفتنه انسانه جمعة كل الصفات الشينه حكمتها في الحياه الغايه تبرر الوسيله حتى لو كانت هالوسيله تحمل من القذاره و الشر الشي الكثير)

في بيت ابو راكان

قالو لهم مناسبة العزيمه وردود فعلهم اختلفت فيهم اللي كان حاقد وفيهم اللي كان وقع الامر عليه عادي ومافرح للخبر غير ندى ولين وراكان بس صدمتهم لان الملكة صارة بدون مايدرون فيها او يحتفلون
ام ماجد ماتفاجأة لانها كانت تعرف بالموضوع قبل لايصير وموقفها منه نفس موقف ابوها
راحو الضيوف يتعشون ومابقى غير ليان ولين وندى
لين : مبروك ياعمري صدق مافرحت فيك مثل ماابي وكل شي صار بسكات بس المهم سعادتك
ليان وهي تضمها : يابعد عمري كافي اللي سويتيه لي اليوم
ندى : ياللي ماتستحين ماتقولين عندي بنت خاله افرحها والله اني دايم اقول لامي لاتخافين الا من الساكت
ليان : اللي يسمعك يقول اني كنت ادري
ندى : ياحظي توك تدرين انك تزوجتي؟
ليان : صدق انك خبله اقصد اني مادريت غير لما جاب لي ابوي الدفتر العصر وقال وقعي
ندى : قولو آمين
ليان + لين : آمين
ندى : آمين
لين : حنا قلنا آمين انتي قول دعائك
ندى : ايه صح نسيت اني مادعيت ارجعو قولو آمين
ليان + لين : امين اخلصي
ندى : يالله انك ترزقني مثل مارزقتها وماادري غير وامي ساحبتني من شعري وراميتني على عريسي يالله انت عالم بحالي ان مافيني صبر على خطبه وملكه وهالخرابيط ابي كل شي حامي حامي مثل هالخبله اللي جنبي
ليان : يالخبله استغفري لا يستجاب دعاك
ندى : والله مالخبله غيرك انا اقوم اصلي مع امي القيام كل ليله علشان ادعي هالدعاء
ام ماجد : وانا اقول وش هالطواعه اللي نزلت على بنتي اثاريه علشان تدعي بالعرس
ندى بخوف : يمه الله يهديك دعابه والا انا ماابي العرس اخاف اعرس ويفضالك البيت وتخربينها تعرسين عاد عجوز تسوينها وتكتبين البيت بسمه
ام ماجد وهي تخز بنتها بنظره لها ألف معنى : ليان يمي تعالي راكان يبيك
قامت معها ليان بدون ماتتكلم حاسه بخوف مو طبيعي وتدعي في قلبها ان راكان مايقولها تدخل عند فيصل



في بيت ابو تركي


رفضت لمى تقول وش فيها غير بعد مايبدلون ملابسهن ويلبسن شي مريح
منال : يله قولي وش فيك وايش اللي قلبك فجأه
لمى وهي تقراء رساله بجوالها : الحين اقولك بس خلينا ننزل تحت نشرب شي
منال : يأكثر طلباتك الليله يله امشي
اول مانزلو تحت كان جرس الباب يدق.... ودخلت عليهم سحر بعد مافتحت لها الشغاله الباب
منال : سحر وش جايبك الحين ؟؟ وش فيه لمى تكلمي قولي وش صاير
لمى بخوف : منال فيصل تزوج
منال وهي تمسكها مع ملابسها من قدام : ياحقيره كم مره اقولك مااحب هالمزح؟؟
سحر وهي تحاول تبعدها عن لمى : منال اتركي البنت واهدي الين نعرف السالفه
لمى بخوف وبصياح : منال وربي مااكذب اليوم العصر كانت ملكته كل هالضيقه اللي فيني عشانك
ماردت منال بأي شي كل اللي سوته انا تناظر لمى بصدمه
سحر : منال ياعمري ردي علي واذا على اللي تزوجها والله مايمر عليها السبت الا هو مطلقها وانتي تعرفيني زين
منال بهدوء غريب : تكلمي مين اللي تزوجها فيصل؟
لمى بتردد : تزوج ليان
منال (بصراخ ) : لاااااااااااااااااااااااااااااااااا
سحر : من ليان اختك
لمى : لاتقولين اختي انا مالي خوات الا لين وراما ومنال اللي اغلى علي من روحي
سحر : اشلون يعني اللي تزوجها فيصل اختك او لا
لمى : ايه بنت امي وابوي لكن ماعمري حبيتها اخذت اهتمام جدي كله بحضوره لازم نعامله كأميره والا تحل علينا اللعنه
كأن ماعنده حفيده غيرها حتى امي وابوي مايحبونها
سحر : يعني عادي عندك لو ضريناها
لمى بخوف (صحيح ماتحبها لكن بالاخير تكون اختها) : شلون يعني تضرونها؟؟
سحر : اطمني ماراح نسوي لها شي غير ان فيصل يطلقها ومساعدتك مهمه لنا
لمى : بس ....
منال بحده : بدون بس حددي يامعي ياضدي ولاتنسين اني اعرف كل اسرارك وانا اقدر اسوي اللي ابي بدون مساعدتك لكن بضطر اني اضرك حتى انتي
لمى : انا معك ياقلبي بس لاتنسين انها اختي ولو بيمس سمعتها شي بنضر منها انا ولين
سحر : من هذي الناحيه اطمني ماراح يمسكم شي كل اللي بيصير ان فيصل بيطلقها
لمى : اذا كذا انا معاكم
سحر : تعجبيني دام كذا لك علي يامنال لا احرق قلبها واخليها تبكي بدال الدموع دم واذا على فيصل انا وعدتك انه مايمر عليه السبت الا وهو مطلقها ... لمى احكيلي عن ليان
لمى : مافيه أي شي اقوله لك ماعندها أي خرابيط واغلاط الواحد يمسكها عليها مالها صديقات غير بحدود الجامعه بس
حتى ماتكلمهم من البيت امى وابوي مايحبوها مثل ماقلت لك اللي يحبونها في البيت راكان ولين حياتها من البيت للجامعه ومن الجامعه للبيت وفي الاجازات مثل الحين ماتطلع من البيت حتى اسواق ماتروح لها
سحر : وكيف عايشه؟؟؟
لمى : أسأل نفسي كثير هالسؤال بس شكلها تأقلمت لان امي مشغلتها في البيت مع الخدم طول الوقت
سحر : وشلون بنورطها هذي
لمى : قلت لك مافيه شي تقدر تمسكيه عليها
سحر بتفكير : ماتدرين يمكن هالشي هو اللي بيضبط خطتنا ... قلتيلي اخوك راكان يحبها
لمى : يحبها اكثر من الكل ودايم حرب مع ابوي وامي علشانها
سحر : عندي فكره بس ماادري تأيدوني فيها او لا صراحه هي فكره قذره بس هالشي الوحيد اللي بيدنا وراح يدمرها
منال : دام بتدمرها انا موافقه عليها بدون حتى مااسمعها
سحر : وانتي يا لمى لان بدونك ماراح نقدر نسوي شي؟
لمى : قولي شنو خطتك واحكم








وش هي الخطه اللي حتى سحر بكل قذارتها قالت عليها انها خطه قذره ومو متقبلتها؟؟؟؟
هل لمى راح تساعدهم في تنفيذها لانها هي اللي راح تلعب الدور الرئيسي بالخطه؟؟؟؟
ايش رايح يصير على مقابلت فيصل وليان وايش بيكون شعور كل واحد منهم؟؟؟؟؟





اختكم معزوفه حزينه